المؤرخين بالمستقبل راح يصفون زماننا هذا بزمن عبادة المشاعر، المحتوى والإعلانات هدفها الأول إثارة مشاعر المتلقي، خالف المألوف، أثر الفضول، وتجاوز الحدود تهييج زائد للمشاعر جعل عندنا شره شديد لتفريغ مشاعرنا، وجانا الآن محتوى القصص والمحادثات المصورة اللي كلها تحمل نفس النمط لو ركزنا نلاقيها - أم تفرق بين عيالها - زوجة مصروفها وطلباتها أكثر من نصف راتب الزوج - مواقف زملاء عمل لا أجد لها وصف مناسب ومهندسين المشاعر فيها صح لازم فيه ضحية ولازم شرير والبطولة تكون لأصحاب التعليقات احنا كقارئين فقط صرنا بين ثنتين: يابلادة عاطفية ماندري هذا صدق ولا كذب ونشكك بكل شيء يامستهلَكين شعوريًا ونبني تصورات خاطئة عن هالحياة وتجاربها اللي ماعشناها، أجل كيف تأثرنا ؟ «لأن لا وجود لشيء داخل العقل لم يسبقه وجود داخل الإحساس» الأكيد أننا في نهاية اليوم نحط راسنا على المخدة مثقلين جدًا من حجم المؤثرات اللي تعرضنا لها

وأنا اتابع آخر حلقات ستيفن عن اللي صار لأدمغتنا وبعد ماصار تأثير المقاطع القصيرة واضح للجميع هو فيه أحد وقفها بشكل نهائي؟ ولا مجرد تقليل ونرجع وكأنه شر لابد منه؟ فيه أحد لحق على نفسه وحط نظام له ولأهل بيته ولاكلنا ضحايا ؟

يجي في بالك لما تبي تبدأ شيء جديد بحياتك أنه يوووه وينك ووين الناس كيف بتنجح بينهم والمنافسة وأنك تتميز بتكون صعبة!! أنا كنت أفكر كذا للأمانة، بس الصدق أن أغلب الناس مو جادين، بس عندهم حماس البدايات أخس أنواع الحماس؛ لذلك القاع مزدحم جداً، الكل طموح وعنده أفكار وناوي يسعى، بس كل ما طلعت فوق تكتشف أن العدد يقل الناس ملولين ومشتتين، الاستمرارية والتركيز عملة نادرة جداً لو تجيب ألف شخص بيتعلمون شيء جديد هذا بيكون وضعهم نفس الصورة👇🏽 الآن فهمت تشارلي مانجر لما قال: "خُذ فكرة بسيطة، وأعطها كامل اهتمامك وجديتك"

رمضان شهر الانقطاع عن المألوف الإنسان اللي قادر يوقف أجمل احتياجاته وأمتعها أكثر من نصف يومه، قادر يبدأ ويبطل أي شيء في باله حرفيًا الإرادة والانضباط عضلة، إن كانت ضعيفة فرمضان يقويها، وإن شاء اللّٰه بنستغله خير استغلال وإن قوانا إبليس وغلبنا الشك بانضباطنا، فنصلي خمس مرات باليوم كتاباً موقوتاً، وقت لا يتقدم ولا يتأخر فمالنا بعد هذي حق بالشك ولا! اللّٰه يبارك للجميع ويتقبل صالح الأعمال 🌙🤍

٧ مليون دولار بمقال ماياخذ منك نص دقيقة من أجمل ما قرأت هاليوم شي مذهل مذهل بسم الله نفعل وضعية سعد وحسين

كلنا فاقدين شيء ونظن لو كان موجود أن الدنيا بتكمل، وتجينا صدمة لما نحصّل عليه لأننا بالغنا في تقديرنا له المفقود هو أعظم احتياجات الإنسان، غلط؟ إيه نعم بس هو يشوفها كذا وش نسوي بهالإنسان ما يقدر عليه إلا الله كائن يعتاد على الموجود ويزهد فيه، اللي بين يدينه أمنية غيره، ومع ذلك يروح يدور على مفقود ثاني والصدق يمكن هو يستمتع بفكرة أن عنده مفقود وجالس يبحث عنه يعطيه شعور بالحياة دافع له يصير بس العجيب في باله هي كيف بتكمل وهو دائمًا فيه أحسن؟ في الزواج مثلًا فيه من هو أفضل من رفيقك! وأحسن من صديقك، ووظيفتك، والأكيد أكثر من مالك لكن الله ما تركنا أعطانا توجيه، قال النبي ﷺ: (لو كان لابن آدم واديان من مال لابتغى ثالثاً، ولا يملأ جوف ابن آدم إلا التراب) وكأنها غريزة في الإنسان، لذلك حظيظ اللي يشوف النقص ويتأقلم معاه ويحاول يرضي نفسه فيه، ويكون مبصر للحد اللي يخليه يفهم المعادلة الحقيقية "دائمًا فيه نقص"ولذلك دائمًا مفتقرين لله بنسعى واحنا مبسوطين باللي عندنا ونشكر الله عليه

هالقناة جابت فكرة غريبة جمعت اغنياء وفقراء مع بعض وسألتهم بعض الاسئلة مثل: هل يجب فرض ضرائب أكبر على الأغنياء؟ هل أصبح الثراء الآن أسهل من أي وقت مضى؟ نقاشات حادة بدون اتفاق، لكن كثير من الأفكار المطروحة لا تتوافق مع التعاملات المالية الإسلامية ولكن اللي صدمني بشكل ماكنت اتخيله آخر سؤال كان: هل المال هو مفتاح السعادة الحقيقي؟ سؤال مكرر عارفة ولكن تخيل معاي أنه السؤال اللي اتفقوا فيه جميعًا على أن المال ليس المفتاح !!! افهم لما تجي من الغني لكن الفقير كيف شافها كذا والله اجوبتهم ومدى وعيهم يُدرس السعادة عندهم كانت على رأسها الزوجة الطيبة، العلاقات والعائلة، العمل اللي تحبه وتحس نفسك مؤثر من خلاله اتفقوا وبالتحديد الأغنياء أن المال قد يكون لعنة على صاحبة لأن مع زيادة المال تزيد المسؤولية وتبدأ تتساءل عن صدق من حولك هل هم معاك عشانك ولا عشان جيبك؟ لما تقوم من النوم عشان الريال وتنام بعد ماتتعب وأنت تركض وراه هذي مطاردة تُهلك الإنسان وممكن يعيشها حتى لو كان اغنى الناس مافيه عاقل ينكر أن المال يوفر راحة بال لها دور بالسعادة أكيد ولكن أفضل الخلق يقول "تعس عبد الدرهم تعس عبد الدينار" اللهم صلِ وسلم عليه هالمقطع بيخليني أراجع نفسي زين، العلاقات مهما حاولنا نتكبر على الموضوع تصنع منك شخص مختلف تمامًا فالله الله بحسن اختيار الناس من حولنا

أنا اقرأ وانسى وإذا تذكرت معلومة معناتها نسيت وين قرأتها وهذي تقهرني أكثر، فجلست ابحث عن طريقة للقراءة ممكن تكون أفضل لي وتعرفت على (راين) بمقطع يوتيوب 👇🏽 عرفت أنه كاتب وقرأت له كم كتاب، هالإنسان يقرأ بشكل كبير جدًا ويستخدم طريقة لفرز المعلومات غريبة فعلى سبيل المثال؛ كل معلومة تشكل إقتباس في مجال معين يكتبها بورقة صغيرة ويجمعهم مع بعض حتى يسهل عملية الوصول مكتبته عبارة عن أرشيف مرعب اللي يشوف هالشي بيقول بأي كهف راين عايش؟ تكتب بورق وتحفظها بصناديق من جدك !! بهالمقال يقول أنه استخدم الذكاء الاصطناعي وانبسط عليه هو وعائلته، ولكن سأله عن إقتباس معين ورد الذكاء كان لا الإقتباس لشخص آخر!! ولما سأله راين من وين معلومتك وش مرجعها أي كتاب وصفحة، وصل معاه إلى أن الإقتباس غير صحيح ونقطة نهاية السطر. يقول راين شككني بنفسي أرجع للأرشيف ووجدت المعلومة ومصدرها وهي صحيحة مية بالمية السؤال المهم الآن !! ماذا لو راين مايعرف المعلومة هذي رسميًا بينلعب عليه فيقول … «يجب عليك أن تفهم في مجالك بما يكفي لتعرف الأسئلة التي يجب طرحها والأهم من ذلك الإجابات التي يجب رفضها، لو لم أكن قد قرأت بعمق في هذه المجالات لخُدعت» لعل بيجي يوم قريب أو بعيد الله العالم.. بنكون بحاجة الناس اللي عندهم المهارات القديمة مثل القراءة، المعرفة، التفكير، والتحليل وبتكون عظيمة جدًا وبتميز الناس عن بعضها البعض المقال كامل 👇🏽

جيمس ستوكديل كان طيار حربي في البحرية الأمريكية، وفي حرب فيتنام تم إسقاط طائرته وأصبح أسير حرب لمدة سبع سنوات ونصف. خلال هذه الفترة، تعرض لأكثر من عشرين نوع من التعذيب بشكل متكرر، وما كان عنده أي سبب منطقي يخليه يصدق إنه راح يطلع من هذا الجحيم حي. بعد ما تحرر، سأله الكاتب جيم كولينز في كتابه Good to Great عن سر صموده، وعن مين هم الناس اللي ما قدروا يصمدون وماتوا في الأسر. ستوكديل قال (أول من ماتوا هم المتفائلون). استغرب الكاتب وسأله كيف يعني؟ شرح ستوكديل وقال إن المتفائلين كانوا دائماً يقولون سوف نخرج من هنا بحلول الكريسماس. يأتي الكريسماس وينقضي وهم لسه مساجين، فيحبطون ويقولون أكيد بنطلع بحلول عيد الفصح. يأتي عيد الفصح وينقضي، وبعدها عيد الشكر، وبعدها كريسماس ثاني، ومع كل خيبة أمل كانت قلوبهم تنكسر ببطء إلى أن يموتوا من اليأس. من هنا صاغ ستوكديل المفارقة العجيبة اللي هي أساس نجاته واللي تم تسميتها بمفارقة ستوكديل (Stockdale Paradox) قال يجب أن تحتفظ بإيمان لا يتزعزع بأنك ستنتصر في النهاية، بغض النظر عن الصعوبات، وفي نفس الوقت، يجب أن تمتلك الانضباط لمواجهة أبشع الحقائق في واقعك الحالي، مهما كانت. وهذا بالضبط في نظري شرح لمفهوم إدارة الهزيمة. الفكرة ما هي تفاؤل أعمى أو تجاهل للواقع المؤلم. التفاؤل الأعمى يجعلك تتوقع نتائج سريعة وسهلة، وفي حال ما تحققت تنهار. إدارة الهزيمة الحقيقية، هي التوازن الصعب بين شيئين. الأول ، الإيمان المطلق بالنهاية السعيدة، إنك تؤمن بعمق إنك راح تتجاوز هذه المحنة، وإن هذا الفشل مجرد محطة وليس نهاية الطريق. هذه هي خطوة الاستمرار. الثاني مواجهة الواقع القاسي، إنك تعترف بالهزيمة وتشوفها بحجمها الحقيقي بدون تجميل. تعترف إن الخطة فشلت، وإن الوضع الحالي سيء، وإن الألم حقيقي. هذه هي خطوة التقبل والتكيف. الناس اللي يشوفون الفشل إهانة شخصية هم فعلياً يفتقدون الجزء الثاني من المفارقة. هم ما يقدرون يواجهون حقيقة أن خطتهم فشلت، فيدمجون بين ذاتهم وبين النتيجة، وهذا اللي يخليهم يتحطمون. بينما الشخص اللي يمتلك مرونة نفسية، عنده القدرة يقول صح أنا فشلت في هذه المهمة، وهذا واقع مؤلم ومحبط، لكن هذا ما يعني إن قصتي انتهت. أنا راح أتجاوز هذا الشيء وأوصل للنجاح في النهاية.

خلصت أسبوع كامل خصصت فيه قرابة الأربع ساعات يوميًا للذكاء الاصطناعي جربت كل شي ممكن يخدمني بعملي وشوي لصناعة المحتوى وأقدر أقول بعدها فيه مبالغات كبيييييرة جدًا في صياغة الأخبار تحديدًا أي خبر يبدأ بكلمة وداعًا أعرف أنه أبدًا مو وداعًا حاولت أفهم ما هي غاية الناس من التسويق له بهذا الشكل ماعرفت الصدق ولكن مساعد إيه وبيسرع كثير شغل بس فكرة أني بعطيه أمر مهما كان مفصل وواضح وهو بيطلع لي شغل بدون أخطاء وتعديلات هذي مستحيلة وبكذا أختتم الأسبوع وأقول وداعًا من متابعة أصحاب هالنوع من الأخبار ✋🏼

العودة لها تكشف لنا أن 90% من المحتوى معاد تدويره، يخاطب الغرائز وسطحي ونفس الجدالات العقيمة، نفس الأخبار لا تسمن ولا تغني من جوع العجيب أننا مانستوعب هالشي ألا لما نوقفها فترة والحمدلله أنها تطيح من عينا بعدها ويضعف تأثيرها

هالمقطع يذكرني بالفكرة اللي ودي توصل للجميع بعد كثير تجارب شخصية بمجالات مختلفة هي.. "إدارة الهزيمة" أعظم شي ممكن تمتلكه في حياتك لأن الفشل والخسارة حاصلين حاصلين يمكن بالبداية يمكن بالنص بعد ماتنجح وهذي الله يعين عليها مؤلمة أكثر هل أقصد بإدارة الهزيمة يعني استمرار وبس لا بل استمرار مرن مو تكرار أعمى لأخطاء الماضي أولاً تقبل لا تجلد ذاتك ثانيًا تكيف تعلمنا درس والحياة دروس ميخالف ناس شفتهم بعيوني لو قالي أحد عنهم ماصدقت يشوفون الفشل إهانة شخصية لهم لا تشخصنها ياحبيب قلبي، خطة فشلت فكرة فشلت أمر الله من سعة أنت راس المال الفصل بين الذات والنتائج مهم جدًا فيه ناس تبارك الرحمن مجبولين على هالصفات مثل (مرونة نفسية - قوة إرادة) عندهم تشكيلة رهيبة وناس زيي ويمكن زيك لازم نجهاد أنفسنا عليها والتجارب المرّه تقوينا

مع حزة قهوة المغرب في بيتنا كانت فيه سالفة حاضرة بشكل شبه يومي عند أخواني بدايتها (إذا تقاعدت بسوي) ونجلس نسمع الأحلام المؤجلة يفتتح السالفة أخوي المكروف في شغله يقول؛ إذا تقاعدت بشتري هذيك المزرعة برا الرياض وأعيش فيها أقوم الصبح يالله من فضلك ويسرد لنا روتين رهيب وكل يوم يغير لنا فيه لحد اليوم اللي أصغرهم سنًا فعلًا شرا مزرعة وهو في بداية حياته الوظيفية نزل هالخبر كالصاعقة على من هم أكبر سنًا، عارضوا الفكرة بحكم أن فيه أولويات مفروض يفكر فيها ولكنه أمر مقضي وصار الصغير كل نهاية اسبوع يخلص شغله يروح المزرعة ويعيش حياة المتقاعدين اللي كانوا يتغنون فيها حصلت بعدها بسنة قرارات قوية كتقاعد مبكر لصاحب الأحلام المؤجلة ومحاولة تعويض مامضى إذا وصلت هنا وأنت تقرأ اظن أنك بتفهمني لما أقولك أني كنت اسمعهم ومعاي فنجالي أقلب فيه وفي بالي ليش تنتظرون التقاعد عشان تعيشون؟ أفهم أن الإنسان في بداية حياته يعيش بوضعية سباق حتى يأمن حياة ومستقبل طيب لعائلته يخليه يشوف التقاعد خط نهاية لهذا السباق ايضًا نموذج الحياة اللي نعرفه وتربينا عليه هو خطي بمعنى في الشباب اجتهاد في الكِبَر راحة واستجمام الخط الزمني التقليدي هذا يربط الاستمتاع بالعمر يحسسنا بتأنيب ضمير لو استمتعنا واحنا صغار ولكن ملاحظتي اللي شفتها فيهم هي أن الحياة والسعادة ممارسة من الصغر مو شي مؤجل ابدًا اللي مايسعده إجازة اسبوع ماراح يكون سعيد بالتقاعد الأغلب أنه بيتعب نفسيًا لأنه مايعرف هو مين بدون الشغل التقاعد لا يغير الشخص بل يكشفه إذا كنت شخص قلق ومهموم في شبابك، التقاعد بيعطيك وقت أطول للقلق لاتنسى نصيبك من الدنيا قد ماتبلغ التقاعد من غير شر فاستمتع هذيك المتعة اللي تشحنك تكمل المشوار لاتتحسف عيش حياتك النماذج اللي شفتها كانت خير معلم لي.

كنت ألوم الشخص المنكشف أمام الناس، يقول اللي ما ينقال لكن خلنا نحسبها صح ليش تتحفظ وتعيش بخصوصية إذا كانت حياتك الشخصية ممكن تكون سلعة وثمنها غالي؟ الجمهور يبحث عن إثارة يفتقدها في روتينه، والمنكشف يتبرع بحياته ليغذي هذا الفضول تبي نسميه «اقتصاد مشاعر» ولا يهمك، لكنه ناجح جداً المخيف لي ولك كأشخاص متحفظين، أننا بدأنا نحس وكأننا مو عايشين لأنه ما فيه متفرج على حياتنا! وكأن مشاهدة الناس لنا هي شهادة ميلاد للحدث ما شافوه الناس؟ أجل ما صار ولا له قيمة والصدق أن المعيار الإجتماعي للخصوصيات اختلف وأكثر سؤال يجي في البال هل أنا متحفظ بزيادة؟ أم الناس مكشوفين بزيادة؟ لذلك، أعتقد أن الخصوصية بتكون شيء نادر مع الوقت، وهي أسمى تمثيل لحق الملكية إنك تمتلك لحظتك بالكامل، ولا يشاركك فيها غريب

انهبلت تطبع الكتاب المقدس وتوزعه على الناس كلها ! هذا كان كلام الكهنة لما اُخترعت آلة الطباعة وصاروا يحسون أنهم يفقدون مكانتهم واحتياج الناس لهم كونهم محتكرين المعرفة بطريقة نسخ الكتاب بخط اليد فحاربوا المطابع ينعمي الإنسان أمام أي شي يهدد مكانته والحاجة له يتحول لمحارب شرس مقفل عيونه، نشوف هالشي بالذكاء الاصطناعي اليوم رغم أن فيه مسار التعلم وتحسين الإنتاجية غير أن فيه رزق وفرص، لكن الإنسان عدو مايجهل.

من أهم المواضيع في السعودية اليوم إن ماكان الأهم واللي ما أخذ حقه بالطرح موجود بنشرة الجبرين عن «تكدس الوظائف في الرياض» ضروري الكل يقرأه ويفكر فيه طبيعي اللي تعيشه الرياض؟ وش أثره على المدن الثانية؟ وأثره علينا اجتماعياً وهذا الأهم"بنظري" والشركات اللي جزء كبير من تشغيلها خارج الرياض كم تكلف؟ مقال موفق يغطي كل الجوانب 👏🏼

ليش نصور لحظاتنا الخاصة ؟ كنت اظن أنها للإستعراض قدام الناس لكن قرأت للمحلل الفرنسي سيرج تيسيرون يقول: أن "الإنكشاف" ومشاركة هدايا الخطوبة أو تفاصيل الزواج غايتها تعميق شعورك الباطني باللحظة لما تدمج ردود أفعال الناس مع فرحتك، أنت جالس "ترسّخ" الشعور في نفسك ويكون أثبت يعني وكأنك توثق الحدث في ذاكرة الجميع عشان يثبت في ذاكرتك أكثر اقنعني؟ لا لأني مازلت اشوف الخصوصية بهالأمور تزيد على قدر ما يتصف به الإنسان من الشرف و الأمانة لكنها وجهة نظر قد تعطينا صورة أكبر وتهون علينا اللي نشوفه

✨دائماً اتسائل بداخلي ايش الشيء اللي يخلينا نستصعب مهمة " النشر " عندنا بالذات لصٌناع المحتوى أو المتخصصين بمجال معين.. لقيت الجواب بمقطع ألهمني ،لفتني فيه كلامها حاجة لامستني وهو أنه أوقات أداء المهمة نفسها نصعبها.. بعطيكم مثال : -أبغى أألف كتاب >> بس لازم أقرا قبله 10 كتب >> ولازم أراجعه أكثر من مره.. أنا هنا صعب المهمة علي كثير ، بينما لو بديت على طول وتؤكلت على الله وقللت من المهام اللي تسبق المهمة الأساسية لأنجزت .. -هذا المقطع اللي غير مفهومي يستحق تسمعونه : youtu.be/pxpI2GV2ZVQ?si=7hiZ… @mashaelm2m @imind2mind شكراً لك على هالطرح..👏🏻✨

تخيل معاي أداة اعطيها نص الحلقة وطريقتي بالمنتاج، يفتح لي الذكاء الاصطناعي افتر افيكت يرتب لي لقطات مناسبه مع موشن جرافيك مع صور الكتب والإقتباسات اجي أنا أسوي رتوش وتعديلات بسيطه ياسلام ياسلام الله يعجل بها