#تساؤلات | بودي أن أشكر اخواني واخواتي الذين يقرؤون الشروط ويطبقونها بحذافيرها ، أنتم فعلاً تسهلون من مهمتي في خدمتكم وأنا ممتن جدا من التزامكم ، الحسابات الاباحية أو المتابعة لحسابات إباحية سيتم تجاهلها أو سيتم حظرها مباشرة ، اسأل الله بأن يوفقكم ويسعدكم ويسهل أموركم في الدنيا والآخرة 🤲💐😊

#تساؤلات | أنا خاطب من ناس بالبداية ما كان بينا أي مشكلة لكن مع الوقت حسّيت فيهم شوفة نفس يعني كانوا ساكنين بجنوب الرياض قبل كم سنة ونقلوا للشمال وصاروا يحسون إنهم من كبار القوم مثال بسيط إذا بغيت أتواصل مع أبو البنت يقولون “والله طالع مقناص” او ” مسافر فرنسا ” وحركات شيوخ وكذا وأنا أدري إنه وقتها جالس مع أخوياه المتقاعدين بالاستراحة وشفته بنفس اليوم مو مسافر ولا شي وضعهم عادي جدًا وبرضو لاحظت إنهم يحبون المظاهر بشكل مبالغ فيه وأنا وضعي عادي ومتواضع وش تشورون علي؟ أفكّر إني أنسحب دعواتكم وشوركم تكفون

#تساؤلات | ممكن تنزل سؤالي ابي دكتور شاطر في الجهاز الهضمي في #الرياض شاطر مره من تجربه

#تساؤلات | ما احلل ولا ابيح من يعطي كلام غير واقعي كانت علاقتنا انا وزوجي كويسه وحملت باول مولوده وجبتها عمليه ومن بعد ماجبتها وهو متغيررر من جميع النواحي وصار هجر بكل شي العلاقه قبل يومياً الان بالشهر مره او مرتين تعبت نفسيتي من التفكير وبدال ما المولوده تقربنا لبعض صار بعد وجفا وضعف شديد شكلي نفس قبل مااحمل جسمي نفس قبل الحمل اهتمامي نفس يوم كنت عروس مافيني نقص ومتاكده ايش الاسباب اللي ممكن خلته يبعد كل ذا البعد؟

#تساؤلات | وش سبب الزوج الي يغصب حرمته على اهله وهو داري ان هم الي ما يحبونها و يأذونها ؟ و اوقات كثير يصدق كذبهم عنها و يتهاوش معاها بسبتهم ، هذا ايش الحل معه ؟ هل ممكن يتعدل و يفهم ولا بيستمر الوضع ؟

#تساؤلات | انا موظف في شركة ومكتوب راتبي بالعقد ٤ الآف ريال واستلم ٣ الاف وخمسمئه فقط لي اربع شهور موظفه وكل ما كلمت المالك قال اثبتي نفسك ! ما جبتي التارقت! هل فيه اجراء قانوني يضمن حقي؟

#تساؤلات | السلام عليكم ورحمة الله وبركاته عندي استفسار بسيط جدا انا الوالد توفى الله يرحمه ويغفرله ويسكنه الفردوس الأعلى من الجنة وانا رجال مريض نفسي وابوي متقاعد مدير مدرسة حكومية متقاعد هل لو ارفق تقرير الطبي يجيني تقاعد من راتب ابوي وشكرا لكم يا محترمين

#تساؤلات | السلام عليكم انا متزوجه بدون اطفال من القرابه ٣سنوات ونصف وحياتنا جميله وكلها حب وموده وهو مو مقصر وطيب والكل يتكلم عن علاقتنا وحبنا لبعض..وصارت في مشكله بين العائلتين وصلت لنا وتضررنا ،وبعدها صار فجأه ينفر مني واذا جاء البيت يجي مشتاق لي وهو بنفسه يقول كذا لكن يجيه تعب وضيقه وينفر مني ،بالرغم اني مهتمه بنفسي وتصرفاته كأنها غصب عنه احس حتى ملامحه تتغيرت مو نفس الشخص قاسي ،بعدها قال لي كلام ان اهله اجبروه على الزواج بالثانيه للانجاب مع العلم اني سليمه (لكسري والانتقام من عائلتي) واخرجني من المنزل ليتزوج لان وضعه المادي لايسمح بفتح بيتين وتزوج له اسبوع تقريباً من فتاه مصابه بمرض وراثي الله يشفيها يعني ينتقل للابناء وهذا يوضح لي انه للانتقام وليس للانجاب! وقال بتبقين معلقه عندي ورفض الطلاق على اساس يحبني مع العلم مافي مؤخر عشان مايطلق ولا اتوقع انه يبغى افسخه عشان ارد المهر ؛لان كل شروط فسخ النكاح بلا عوض موجوده يعني مو هذا السبب ماادري ايش سبب الرفض ، وانا حالياً في بيت اهلي معلقه٦شهور بدون سكن ،ولم يحاول الاصلاح او حتى تركي في منزل الزوجية ومافي تواصل بيننا،واهلي بعد هذا رافضين فكرة الرجوع والاغلب يقول افسخي النكاح وانا والله اتمنى انه يطلق من نفسه ابغى تجي منه ما ابغى انهيها بمحاكم مهما كان بيننا عشره والله اني اتذكر ايامنا وتوجعني ويعلم الله اني احبه للحين رغم اللي صار لاني اعرف معدنه طيب وكان زين معي وما اعرف وش اسوي بوضعي هذا! خصوصاً انه مامهد لي وانا متعلقه فيه وباقي مو مستوعبة كيف تركني وهان عليه كل اللي بيننا !..انا تعبت صحياً ونفسياً لهذا السبب ماصار لي رغبه بالحياه .ممكن تفيدوني ايش اسوي بهالوضع ؟

#تساؤلات | السلام عليكم أنا عندي تقرحات في الفم للي تقريباً شهر وانا عاني من هاذي المشكلة لدرجه اني متنع عن الأكل بسب الآلم كانت في الفم بشكل كامل والان عندي تقرحات على للسان فقط مولمه ماهو العلاج المناسب لها جيت كم مستشفى وخذت علاجات ولا نفع شيء تخف بشكل بسيط جدا فيدوني جزاكم الله خيرا

#تساؤلات | سلام عليكم انا بنت عمري ٢٦ منفصله وعندي ولدين الان تقدم لي شخص موافق يكونون عيالي عندي ووافقت عليه لكن سؤالي انا خايفة طليقي ياخذ عيالي مني تنصحوني اعلن الخطوبة او اخليها بيني وبين اهله محتاره ولا ادري من استشير😔

#تساؤلات | السلام عليكم إذا حملت المرأه وزوجها مستمر على الديز—رت هل يؤثر على الجنين ؟ ولازم يقطعه ولا لا ؟ مع العلم الفحوصات سليمه

#تساؤلات | سلام عليكم ورحمة الله وبركاته انا لي فتره متملكه ورقمي معه وش السبب الي يمنعه مايتواصل معي بذات لنا فتره طويله متملكين هل ابادر ف التواصل او انتظره لين يتواصل معي افيدوني محتاره لي كم يوم ابادر ف التواصل او لا

#تساؤلات | ابيك تسائل متابعينك انا شخص رياضي وعمري 40 سنه والحمدلله مهتم كثير بنفسي بس احس بثقل ادري العمر له دور بس ابي شيء يخليني اخف احس جسمي وعضلاتي ماتكون ثقيله في علاجات بصيدليه مناسبه لشيء واذا على الأكل والنوم الحمدلله مرتب وضعي ومنظم لكن ابي ادويه من الصيدليه وشكرا لكم

#تساؤلات | السلام عليكم، سؤال الحين الرجال عادة من وين يحصلون بنات يتزوجوهن؟ أنا رجل ناوي أتزوج، بس السؤال من وين ألقى بنات للزواج؟ عندنا في عائلتي زواج اقارب أكثر شيء وصراحة أقاربي ما عليهم زود كويسين، ومو كلهم نفس الجينات، يعني مب كلهم عيال عمام وعمات ماخذين بعض، لا، فيه تنوع جيني نسبيا، ويقولون الي تعرف أصله وفصله وطينته وتربيته (القريب) أحسن لك من البعيد الي ممكن على الورق كويس بالنسبة لك لكن خفايا الأمور ما تعرف عنها بس ياخي ودي أدخل مغامرة أتزوج بنت من بيت جديد ونتعرف على ناس جديدين، المشكلة شلون... من وين القى بنت بالمواصفات الي ابيها من بره، وأيضا، إذا هي من بيت كويس بالمجتمع جمالا واخلاقا وعلما، ليش هم يجازفون ويقبلون بي، رجل غريب، ممكن كعائلة معروف بس أظل غريب كفرد على بيتهم... هم غالبا عندهم رجال أقارب ممتازين وبنفس المستوى، وفوقها يعرفونهم وخابرينهم، فشلون بنافس أنا؟ والله حيرة

#تساؤلات | السلام عليكم .. اخواتي .. ايش حل هالمبه … غيرت الكفرات الان .. ولازالت تأشر ثم تثبت شغاله .. وهواء الكفرات والاستبنه ٣٥ .. عطوني لها حل باقل الخساير 🙏🙏🙏 ⁦

#تساؤلات | أرجو الرد بدون تجريح.. عمري ٣٠ عزباء تقدم لخطبتي رجل أعزب يُثنى عليه، البعد بين مدينتي ومدينته اللي فيها الشقة (ساعتين) بالسيارة. وبين عمله والشقة قرابة ١٢ ساعة. يداوم أسبوعين وأسبوعين إجازة، قالوا لي بهالأسبوعين فترة دوامه إذا أبغى أروح لأهلي عادي، أنا رفضت مباشرة لأن التنقل وإن كان مرة كل أسبوعين بيتعبني لاسيما مع الأطفال مستقبلاً، كذلك أنا معلمة في المنزل ولي دخل جيد جدًا، وأُعرف بذلك في محيطي من مديرات وأمهات وملاك مدارس، وسبق وكنت في أهلية، أول سبب لي في الرفض الاستقرار وهذا ذكرته لأهلي، وثاني سبب لم أذكره ما أبغى أخسر عملي وبنائي لنفسي أمام حياة قد لا أكون مستقرة فيها نفسيًّا وجسديًّا بسبب ظروف السفر، خصوصًا مع ظروف دوام الخاطب ماراح يكون فيه وظيفة تناسبني؛ لأن لما يحضر أكيد الوقت خاص فيه بسبب غيابه، وكذلك حتى تعليمي المنزلي يحتاج استمرارية مو أسبوعين إي وأسبوعين لا، وما تجرأت أذكر هل ممكن تغيير مكان سكنه أو لا. مرتاحة لقراري ووالدي مايقصر معنا، لكن في الوقت نفسه أفكر نوعًا ما عاطفيًّا بسبب هذا الموضوع، أكيد كل أنثى تحتاج لأنيس، لكن ماعندي استعداد للتنازل، لذلك أفكر هل قراري صحيح أو لا؟، قريبتي تقول عمرك مو صغير، إذا كبرت البنت تقدم لها المطلق والمعدد، قلت لها أنا مؤمنة بقضاء الله وقدره والحياة أرزاق، ومو كل من تزوجت أعزب سعيدة، ولا مطلق تعيسة.

#تساؤلات | ف شي بيصير معايا غريب شفت شخص قبل ستة شهور ولا هوف بالي شفته كان ماشي قدامي منزل راسه وعينه وحسيت من لغة جسده انجذاب بس مشي قدامي وما اثر فيا بس هذه الفترة مو طبيعي بس يجي ف بالي اصحى من النوم واحس صوت كانه يبغى يتواصل معايا مع اني لا اعرفه ولا يعرفني أبدا وانا مو ف بالي والله ايش تفسير اللي بيصير اللي يعرف يقول لي ؟؟؟ او مر زي كذا

#تساؤلات | بقول سالفتي وشوفوا بالله من الغلطان أنا و زوجي وعيالي دايم إذا طالعين نتمشى أمه تتصل وتقول ارجع اخواتك عندهم مشوار او تعال وديني ونحن في وسط الطلعه واحيان ما نكون وصلنا ونرجع ( مع العلم يقول لها اننا برى ) واقول اهله عادي بس الموضوع زاااد آخر مره يوم الجمعه اتصلت عليه ونحن برى وقالت تعال عندي مشوار زوجي قال امي عندها مشوار قلت أنا مو راجعه روح كمل مشوارها وارجع لنا وهو راجع صار عليه حادث وهو الآن في المستشفى طبعاً والناس كلها عرفت بالسالفه الحين هي وبناتها زعلانين ويقولون ان أنا شوهت سمعتهم مع ان والله ما قلت إلا الحقيقه تشوفون اني غلطت لاني ذكرت الموقف للناس ؟

#تساؤلات | صديقتي تقدم لها شخص منفصل وعنده طفلين صغار وسبب الانفصال حسب كلام الاهل ان زوجته جاها مرض ولا تقدر تحمل ثاني وهو يبي ذريه البنت بكر و الرجال سمعته طيبه ، ايش تنصحون

#تساؤلات | السلام عليكم مستاجر بعقد الكتروني وكان الدفع عن طريق حواله على حسابه ماحولت على المنصه هل لو لا قدر الله وطالبني الحواله تفيد في الموضوع ؟

#تساؤلات | صديقتي سحبت علينا قبل فتره و قالت انها ما عاد ترجع و انها بدت تكرهنا لأنها تحس اننا نكرهها و كان بعضنا يبكي و يرسل لها ترجع بس ما ترد و لا تهتم بعدها بشهرين جاها حادث و درينا و مير نطير لها و نسأل و نزورها بالمستشفى و كل يوم نرسل لها بالخاص بحكم انها طالعه من كل القروبات نتطمن عليها وصارت ترد علينا لكن هي قبل سحبت علينا و كانت ناويه ما ترجع بس لمن صار الحادث تغير كل شيء و صارت تطفش بالمستشفى تبي احد يسولف معها ف رجعت و سوت قروب و قالت انها ندمت على الي فات انا رحمتها مره و اللحين رجعت معها ولا كأن فيه شيء صار بس دايم يقولون الي يخونك مره بيخونك مره ثانيه ما ودي اقعد الان ابادر و اسولف و بعدين لا سحبت علي مره ثانيه مت ندم ولا ودي اسحب عليها لان رحمتهااا مره أعطوني آرائكم لو سمحتم ؟